Föstudaginn 21. maí komu börn frá grunnskólum í Reykjavík saman við Gufunesbæinn til að gróðursetja tré undir hatti Grænu bylgjunnar (Green Wave), sem er alþjóðlegt verkefni um líffræðilegan fjölbreytileika. Þennan dag gróðursetja börn um víða veröld tré og mynda þannig Græna bylgju um allan heiminn, en viðburðinum er ætlað að vekja athygli á hugtakinu líffræðilegur fjölbreytileiki og leyfa skólabörnum að hafa áhrif, eitt tré og eitt skref í einu.

Skógræktarfélag Íslands, Yrkjusjóður - sjóður æskunnar til ræktunar landsins - og umhverfisráðuneytið efndu til þessa viðburðar á höfuðborgarsvæðinu.

Kolfinna Pola Grétarsdóttir í 5. bekk og Ísarr Vídalín Hrannarsson í 6. bekk tóku þátt í gróðursetningunni fyrir hönd Breiðagerðisskóla.