Borgarbókasafn veitir verðlaunin árlega fyrir tvær bækur, aðra frumsamda og hina þýdda. Nemendum grunnskólanna gefst kostur á að taka þátt í atkvæðagreiðslu um bækurnar. Þegar atkvæði nemenda í Breiðagerðisskóla voru afhent var tekið eftir því hversu margir tóku þátt. Verðlaunin hlutu Þorgrímur Þráinsson fyrir bókina Núll núll 9 og Halla Sverrisdóttir fyrir þýðingu sína á Stórskemmtilegu stelpubókinni.  Dregið var úr nöfnum nemenda sem tóku þátt í kosningunni og sex heppnir þátttakendur hlutu bækur í viðurkenningarskyni fyrir þátttökuna.

Þriðjudaginn 13. apríl fóru nemendur í  5.bekk ásamt kennurum í menningarferð á Þjóðminjasafnið og í miðbæinn.  Á Þjóðminjasafninu var sá hluti safnsins sem tilheyrir landnámi Íslands skoðaður og  fengu nemendur að klæðast  búningum í anda landnámsmanna.

  Þegar heimsókninni á Þjóðminjasafnið var lokið rölti hópurinn í  miðbæinn þar sem komið var við á kaffihúsi og allir fengu kakó og kleinu.  Síðan var gengið um miðbæinn og helstu byggingar skoðaðar. Sérstaklega voru þær byggingar skoðaðar sem nemendur höfðu áður séð á gömlum myndum og fræðst um í skólanum.  Þetta var hin skemmtilegasta ferð. 

Nemendur í 4. bekk tóku þátt í setningu Barnamenningarhátíðar Reykjavíkurborgar mánudaginn 19. apríl. Öllum nemendum 4. bekkjar í grunnskólum Reykjavíkur var boðið að taka þátt í skrúðgöngu. Skólunum voru úthlutaðir ákveðnir litir og í hlut Breiðagerðisskóla kom silfur. Því var ákveðið að hylja derhúfur með álpappír og búnir til silfursprotar (veifur). Gengið var yfir göngubrúna sem liggur yfir Hringbraut og síðan inn í Hljómskálagarðinn.

Í göngunni voru margar furðuverur sem skemmtu og stríddu krökkunum.  Í  Hljómskálagarðinum fengu allir safa og kleinu í hressingu og skemmtiatriði á sviði. Mesta lukku vakti Fíasól og einnig þegar menntamálaráðherra og borgarstjóri slepptu tveimur dúfum og settu þar með hátíðina. Myndir má finna í myndasafni.